Forvalskostnaður

 

Í aðdraganda forvals VG í Reykjavík og Kraga var ákveðið að halda forvalskostnaði í lágmarki. Það varð þegjandi samkomulag um að kaupa ekki auglýsingar í fjölmiðlum og að öðru leiti að halda kostnaði við kynningu i lágmarki.

Ég verð að viðurkenna að kostnaður minn við forvalið varð meiri en margra annarra. Til að útskýra þetta vil ég hér með gera hreint fyrir mínum dyrum. Kostnaðurinn skiptist þannig:

 Myndataka kr. 2.000.-

Klipping fyrir myndatöku kr. 2.500.-

                       Samtals kr. 4.500.-

 Ég vil þó rökstyðja þá skoðun mína að kostnaðurinn sé í raun talsvert minni.

Þegar frambjóðendabæklingnum var dreift á frambjóðendafundi í Vesturgötusalnum skömmu fyrir forval kom að máli við mig félagi í flokknum sem er sérfróður um almannatengsl.

"Djöfull er þessi mynda af þér vond" sagði hann. "Hún gerir þig ennþá eldri en þú ert". Ég varð að játa að hann hafði rétt fyrir sér. Ég var ferlega gamallegur, eins og það væri ekki nóg samt. "Ég held að réttast væri fyrir þig að leggja myndina inn á Mogganum til notkunar í mögulegri minningargrein" bætti hann við í huggunartón. Mér sárnaði í fyrstu en sá síðan í hendi mér að hugmyndin var góð.

Ég tel því að ég geti með góðri samvisku dregið kr. 2.000.- frá forvalskostnaði og bókfært sem fyrirframgreiddan útfararkostnað.

Þá er upphæðin orðin kr. 2.500.-

Nú er á það að líta að maður þarf að láta klippa sig reglulega hvað sem forvali líður. Og klippingin var ekki einvörðungu vegna forvalsins, ég flýtti aðeins klippingunni um svo sem eina viku. Því verður að teljast sanngjarnt að draga frá klippikostnaði kr. 500.-. Niðurstaðan er þá þessi:

Forvalskostnaður minn var þá kr. 2000.-, "krónur tvöþúsund".

Steinar